各位車住，你是否曾經因為座駕入廠而考慮過租車呢? 如果你有「人牌」但無「車牌」，在假日時是否手痕痕想租架車到新界兜兜風呢?假如你是「新牌仔」，手痕程度可能會爆燈。但租車其實亦都有很多學問的，譬如話怎樣揀租車公司啦?租車還是買車好呢?租車時要注意什麼啦?……為了滿足你的好奇心，我們特意走訪了Hawk租車公司副經理Lawrence Lamport。

問：租車是否貴過買車呢?
Hawk：這會因人而異，例如你用車時間比較多，又或者有自己車位，不用長期付出泊車費，可以接受受長時間擁有一部自己的私家車最低限度四至五年，如果擁有時間只是二三年，車本身折舊的價錢可能已經足夠租車，但如果架車會Keep耐D，那麼買車可能比較平。但買車最好要買新車，因為維修費會平些。不過，買車除了維修費外，還有保險費，牌費，及行政費支出，條數比較難計。如果你唔想俾架車綁住，想靈活些，或每星期只用兩三日車，那租車比較方便及化算。

問：咁點解仲有人租車呢?租車還有其他好處嗎?
Hawk：租車可提供很多方便，譬如話不用一次過花筆錢去買車，或俾分期付款綁住。自己可以靈活D，有突然無需要時，又可以把車退回給租車公司。如果你只想用一至兩年車，又唔想自己煩修理、辦牌簿、搞燕梳等等，咁就交由租車公司去煩啦。租車又可以換車款，有錢可以租貴D，唔方便又可以租架普通D。假如唔好彩有意外的話，又唔駛去煩追討賠償，因租車公司會代客處理，而租客的責任上限通常最多只是8仟元左右。

問：一般什麼人租車多呢?
Hawk：租約長的，通常是公司客多。很多外國公司都為他們的僱員租車用，因為這樣不致投人太大的資金，租車費成為經常性開支，較買車靈活。另外，通常以合約形式聘用的外藉僱員流動量會高D，故租車亦會較買車方便。租車仲可以減少很人手去照顧車隊呢！至於短租的(由一天至一兩個月都有)，通常是自己的車入了廠，又或者公司有短期用車的需要，亦有人假日租車玩玩，另外遊客租車的也有不少呢！

問：點樣揀租車公司呢?
Hawk：首先要搵可靠的租車公司，曾經聽過一些小型的租車公司呢頭租出架車，果頭又搵人開車去撞，跟住仲要屈租客賠錢。其實近年都很少聽到這些事件發生，但都是小心D好些。其次是要搵有你想租的車型的租車公司，有些租車公司只出租某個廠家的車，其他型號就欠奉。最後當然要平啦。不過，有時服務都好重要，租車都係想享受，唔係想受氣嘛。

問：「新牌仔」可唔可以租車?
Hawk：一般租車公司都避免租給「人牌」少於兩年及年齡小於25歲的司機。

問：Hawk相對於其他租車公司有何優勝之處呢?
Hawk：我們的車款多，可提供不同車廠的型號。我們是國際性公司，背景可靠。我們亦比較著重顧客服務，譬如話送車服務就唔係一般租車公司可以做到的。此外，我們的車隊年齡平均才兩至三年車，比較新。假如是長租約的，還可以提供全新車呢！另外租約如超過一年的，會有CDW保障，即是假如發生意外的話，租客的責任上限會減至HK$1,500。

(本欄歡迎讀者及專業人士來稿介紹式討論有關汽車及交通全全知識)